1Cor 3 | PltULB | STEP | Ary izaho, ry rahalahy, dia tsy afaka niteny taminareo tahaka ny olona izay ara-panahy, fa kosa tahaka ny olona ara-nofo, tahaka ny zazakely ao amin’i Kristy.

1 Corinthians 3

1 Ary izaho, ry rahalahy, dia tsy afaka niteny taminareo tahaka ny olona izay ara-panahy, fa kosa tahaka ny olona ara-nofo, tahaka ny zazakely ao amin’i Kristy. 2 Nofahanako ronono ianareo, fa tsy ventin-kanina, satria tsy vonona tamin’izany ianareo; ary na ankehitriny aza dia mbola tsy vonona amin’izany ianareo.

3 Satria ianareo mbola araky ny nofo. Fa na aiza misy fahasarotam-piaro sy fifandirana eo aminareo, dia tsy miaina araky ny nofo ve ianareo, ary tsy mandeha amin’ny fenitry ny olombelona? 4 Fa rehefa misy iray miteny hoe: “Izaho manaraka an’i Paoly,‘’ ary ny anankiray miteny hoe: ‘’Izaho manaraka an’i Apolosy,‘’ dia tsy miaina tahaka ny olombelona ihany ve ianareo? 5 Iza ary Apolosy? Iza Paoly? Mpanompo izay tamin’ny alalany no ninoanareo, izay nomen’ny Tompo asa avy.

6 Izaho no namboly, Apolosy no nanondraka, fa Andriamanitra no nampitombo. 7 Ka noho izany, na izy izay mamboly na izy izay manondraka dia tsy misy dikany. Fa Andriamanitra no mampitombo.

8 Ary izy izay mamboly sy izy izay manondraka dia iray, ary ny tsirairay dia samy hahazo ny karamany avy araka ny asany. 9 Fa izahay dia mpiara-miasa amin’ Andriamanitra. Ianareo dia sahan’Andriamanitra, sy tranon’Andriamanitra.

10 Araka ny fahasoavan’Andriamanitra izay nomena ahy tahaka ny mpanao trano mahay, dia nametraka ny fototra aho ary hafa no manorina eo amboniny. Fa aoka ny lehilahy tsirairay hitandrina ny amin’ny fomba hanorenany eo amin’izany. 11 Fa tsy misy olona mametraka fototra afa-tsy ilay iray izay napetraka, izany hoe, Jesosy kristy.

12 Ankehitriny raha misy olona manorina eo ambonin’ny fototra amin’ny volamena, volafotsy, vato sarobidy, hazo, bozaka, na mololo, 13 dia haseho ny asany, fa ny andro mazava no haneho izany. Satria haseho amin’ny afo izany. Ny afo no hitsapana ny hatsaran’ny nataon’ny tsirairay.

14 Raha mitoetra ny asan’ilay olona, dia hahazo valisoa izy; 15 fa raha may ny asan’ilay olona, dia ho fatiantoka izy, fa izy tenany dia ho vonjena, toy ny nitsoaka tamin’ny afo ihany.

16 Tsy fantatrareo ve fa ianareo dia tempolin’ Andriamanitra ary ny Fanahin’Andriamanitra no mitoetra ao aminareo? 17 Raha misy olona manimba ny tempolin’Andriamanitra, dia hanimba izany olona izany Andriamanitra. Fa masina ny tempolin’Andriamanitra, ary toy izany koa ianareo.

18 Aza avela hisy olona hamita-tena. Raha misy olona eo aminareo mihevitra fa hendry izy amin’izao vanim-potoana izao, avelao izy ho lasa “adala” amin’izay mba mety ho lasa hendry izy. 19 Fa ny fahendren’izao tontolo izao dia fahadalana eo amin’Andriamanitra. Satria voasoratra hoe: “Nahatratra ny hendry tao amin’ny hafetsen’izy ireo Izy.” 20 Ary koa hoe: “Ny Tompo dia mahalala fa ny fihevitry ny hendry dia zava-poana.”

21 Noho izany tsy misy fireharehana momban’ny olona intsony! Fa ny zava-drehetra dia anareo, 22 na Paoly, na Apolosy, na Kefasy, na izao tontolo izao, na fiainana, na fahafatesana, na zavatra ankehitriny, na zavatra ho avy. Ny zava-drehetra dia anareo, ary ianareo dia an’i Kristy, ary Kristy dia an’Andriamanitra.